حكاية الذئبة الحمراء

ثريا اتشخصت إنها مريضة ذئبة حمراء من 14 سنة

هى بنت مصرية من محافظة الشرقية كانت فى الوقت ده عمرها 17 سنة

شعرت برعشة فى جسمها ووحرارة عالية “عادى دور برد وهيعدى ” بس دور البرد طول شوية أسبوع أو اكتر

بعدها الحرارة لسه عالية بتوصل 39 بشكل يومى

بدأت تعانى من ألم وورم فى الركبتين وصوابع إيديها

راحت لأكثر من دكتور وكتبولها مضادات حيوية “كالمعتاد” ومفيش نتيجة

راحت لمستشفى واتحجزت كام يوم (برضه ما فيش نتيجة)

بعد كده اتحولت علينا فى قسم المناعة والحساسية (جامعة عين شمس) بدون تشخيص حتى وقتها

كان واضح عندنا من الأشعة وجود ارتشاح مائي فى الغشائ البلورى (حول الرئة)

وكمان كان فى أنيميا ونقص فى كرات الدم البيضاء

وكان زاد عليها تورم فى الساقين “اكتشفنا بعدها سببه هو إن  الكلى فقدت قدرتها على الاحتفاظ ببروتينات الدم وبينزل كمية كبيرة منه فى البول ”

وعرفنا إنها كانت بتشتكى من فقدان شديد فى الشعر (خصل كاملة من شعرها كانت بتقع على السرير وهى نائمة)

طلبنا لها تحاليل المناعة فتأكد أنها تعانى فعلاً من مرض الذئبة الحمراء

طبعاً هى و أهلها كانوا فى حيرة ومش فاهمين أيه هو المرض ده

شرحت لهم الحالة ببساطة :

ده مرض يصيب الجهاز المناعى ويخليه يهاجم جسم الإنسان نفسه “المفروض الجهاز المناعى ربنا خلقه عشان يهاجم الكائنات الضارة من بكتيريا وفيروسات” فى مريض الذئبة بيهاجم خلايا الإنسان وممكن يصيب أكثر من عضو (الكلى أهمهم – الجلد ممكن يظهر عليه بعض الأعراض – المفاصل – المخ – الكبد –الرئة – الأوعية الدموية…..) عشان كده ليس له مكان معين

هل هذا معناه إن مناعة الإنسان ضعيفة ؟؛ على العكس المناعة هنا قوية ولكن غير موجهة بشكل صحيح

والذئبة عادة تصيب البنات والنساء أكثر من الرجال بحوالى 10 مرات ولكنها عندما تصيب الذكور تكون أقوى فى حدتها

هى ممكن تخف منه؟؛

طيب خلينا أنا أسألكم هو مريض السكر بيخف ؟ لأ

لكنه بيستمر على العلاج طول عمره وبيعيش بشكل طبيعى صح ولا لأ؟

صح يا دكتور

خلاص ثريا هتحتاج علاج مستمر ولازم نتابع مع بعض بانتظام لإن المتابعة الطبية اللصيقة هى أهم عامل للتحكم فى المرض

طيب يا دكتور هى ممكن تتجوز ؟

تتجوز وتخلف عادى جداً بس بشرط واحد

أيه هو ؟

تعزمونى على الفرح

بدأنا العلاج بأدوية كثيرة فى الأول (كان أهمها الكورتيزون وإميوران وغيرهم) وبدأنا بجرعات كبير نسبياً

وهى بدأت تتحسن بسرعة الحمد لله

وبعد كام يوم فى النبطشية حصلت مفاجئة

أهل ثريا جابو لننا فطير مشلتت وعسل

الصراحة كان طعمهم جميل جداً لسه فاكره من وقتها

المهم خرجت من المستشفى بعد ما تحسنت الحالة  وقررت ثريا قرار مهم

“قررت تعيش حياتها بشكل طبيعى جداً وهتنتظم على الدواء والمتابعة وتنسى المرض وتركز فى الحياة”

وبدأت تتابع فى العيادة الخارجية

وبدأنا نقلل الأدوية

وقدرنا نقلل الكورتيزون لجرعة بسيطة جدا (5-10 ملجم) ودي تقريباً جرعة قريبة من نسبة الكورتيزون الطبيعية فى الجسم مع أقراص إميوران فقط (مجموع العلاج من قرصين إلى 3 أٌقراص يومياً)

كانت كل كام شهر ممكن يجيلها شوية حرارة وبنتعامل معاها وترجع تخف تانى

وبعد 10 سنين

جاءت تعزمنى على فرحها “للأسف كنت مرتبط بمواعيد وقتها”

اتجوزت وحصل حمل بعد شهرين أو ثلاثة

ومر الحمل بسلام ووضعت طفلتها الأولى بشكل ويمكن عمرها أكثر من سنتين الآن

والحكاية مستمرة ………….

مع تمنياتى للجميع بالشفاء

دكتور أسامة عبداللطيف
استشارى ومدرس الحساسية والمناعة . طب عين شمس
81 طريق النصر. ميدان رابعة العدوية
مدينة نصر . القاهرة
01065230155