مريم وحساسية الصدر

مريم بنوتة عندها 10 سنوات جائتى فى العيادة مع إمها من ستة شهور

أيه المشكلة؟

الأم: مريم عندها حساسية صدر من أكتر من 5 سنين

طيب أيه الأعراض ؟

الأم: كحة مستمرة ونهجان وضيق فى التنفس وكتير من الأيام مش بتقدر تروح المدرسة ” وتبدأ الأم فى البكاء حرفياَ” أنا يا دكتور نفسى مريم تعيش حياة طبيعية وتروح مدرستها زى أصحابها .

إن شاء الله مفيش مشكلة إلا ولها حل

الأم: (بمزيد من البكاء )يعنى بجد يا دكتور ممكن تبقى إنسانة طبيعية

حضرتك هى إنسانة طبيعية وعندها مشكلة حساسية صدر ودى موجودة تقريبا فى 5-10% من الناس خاصة الأطفال وليها حل عشان تمارس حياتها بشكل طبيعى إن شاء الله

الأم: بس يا دكتور ما بيعديش أسبوعين غير لما تكون واخدة كورس مضاد حيوى دى غالبا مش بتلحق توقفه

دى مشكلة كبيرة علاج الحساسية لا يتضمن مضاد حيوى .. المضاد الحيوى بيكون لعلاج الأدوار البكتيرية حتى دور البرد العادى مش بيحتاج مضاد حيوى ,, على العكس تكرار المضادات الحيوية بيزيد من الحساسية .

الأم : بس هى مش بتخف من غير المضادات الحيوية

قصدك هى مش بتخف بسبب كتر المضادات الحيوية . على العموم لو فى حرارة أكتر من 40 بتكون على الأغلب بكتيريا ولو فى أعراض مثل صديد فى اللوز ( ودى بيشوفها الدكتور) بتكون محتاجه مضاد حيوي وده بيحصل من مرة إلى 4 مرات فى السنة مش طول السنة.

المهم بعد الكشف تأكدنا من التشخيص ( حساسية بالصدر ومعها حساسية بالجيوب الأنفية ) وحساسية الجيوب الأنفية بتكون موجودة فى 90% من مرضى حساسية الصدر وتجاهل علاجها بيخلى حساسية الصدر لا تخف برغم العلاج.

كتبنا العلاج كورس متواصل من أدوية الحساسية لمدة 3 شهور (علاج الحساسية مش بيكون عند اللزوم فى مثل هذه الحالات لازم الاستمرار لفترات يحددها الطبيب حسب الحالة)

وتيجى استشارة بعد أسبوعين

وبعد مرور أسبوعين ,,,,

الأم: مريم حالتها أحسن الحمد لله فى الأسبوعين دول , بس يا دكتور عايزه أعرف سبب الحساسية

اليوم إن شاء الله نعمل اختبار حساسية لمعرفة السبب وتظهر نتيجته فى 20 دقيقة وبيكون من غير ألم

وبعد عمل الاختبار

مريم عندها حساسية من عتة الفراش ومن حبوب اللقاح

الأم : والعمل يا دكتور

هناك بعض الأحتياطات لتجنب عتة الفراش وحبوب اللقاح هتاخدى ورقة مطبوعة بالتعليمات

وأيضاً لو عايزين نخف تماماَ هناخد أمصال الحساسية الخاصة بحشر ة الفراش وحبوب اللقاح

الأم: وهى أيه الأمصال دى

دى بتكون نقط تحت اللسان بيستخدمها المريض وتحضر من نفس مسببات الحساسية بتركيزات قليلة وتزداد بشكل دورى حتى يتعود الجهاز المناعى على مسببات الحساسية وينتهى التحسس منها

الأم: يعنى لو أخذت المصل هتكون إنسانة طبيعية وهتخف من الحساسية

بنسبة 80% هتخف إن شاء الله

وبعد أسبوعين تانى

إتصال تليفونى من الأم وهى تبكى : مريم عندها دور حساسية تانى يا دكتور شديد وهى بتاخد العلاج والأمصال ولسه زى ما هى

من فضلك هاتى مريم العيادة نشوف المشكلة

وبعد الكشف

مفيش مشكلة الحساسية ممكن تتهيج مع العلاج لو اتعرضت لكمية كبيرة من حبوب اللقاح أو الأتربة خصوصا فى الفترة الأولى من العلاج .. هناخد جلسات نيبوليزر لمدة أسبوع وبعدها نرجع لكورس العلاج تانى

واختفت مريم عنى لمدة 5 شهور ولازلت أذكر والدتها وكمية الخوف عليها فى كل مكالمة والبكاء

وبعد 5 شهور

مريم و والدتها فى العيادة

أيه الأخبار؟

الأم: الحمد لله أول مرة يمر علينا الفترة دى(5 شهور) بدون أزمات واستمريت على العلاج 3 شهور ووقفته والآن على الأمصال فقط

أخيراَ بدون بكاء من الأم وبدون تغيب عن مدرستها وبدون أزمات حساسية .

هكذا تكون مكافأة الطبيب بأن يوفقه الله لإزالة معاناة المريض وأهله

ولازالت مريم مستمرة على الأمصال ومستمتعة بحياتها بفضل الله

#حكايت_من_العيادة

مع تمنياتى للجميع بالشفاء
دكتور أسامة عبداللطيف
استشارى ومدرس الحساسية والمناعة . طب عين شمس
81 طريق النصر. ميدان رابعة العدوية
مدينة نصر . القاهرة
01065230155